مخ السحلية يجاوب!! ليه “إم بي سي 2” بتجيب أفلام حلوة وقت الإمتحانات بس

geomarketer13/ August 12, 2019/ اسئلة جهنمية, تجلياتنا

تفضل القناة طول السنة تجيب أفلام عادية و تيجي في وقت الإمتحانات تجيب احسن أفلام !! .. دا اللي بيحصل كل سنة معانا بلا استثناء صح ؟ طيب اشمعنى بقى !! و اشمعنى بنكون عارفين من قبلها بفترة ان القناة هتعمل كدا و مع ذلك لما تيجي الافلام الحلوة بنتفرج عليها و مبنذاكرش برده ؟ وبنفضل نقول هنسقط هنسقط .. طب ليه؟ وإيه علاقة مخ السحلية بالكلام دا كله؟ السؤال دا نقدر نصنفه من الأسئلة الجهنمية

في المقال دا هنجاوبك على سؤال إنت بتدور على إجابته

جوا المخ من جوا اوي في جزء اسمه (مخ السحلية) ايوة عندنا احنا البشر 🙈 ! هل دا معناه مثلا ان اصلنا كان سحلية او اشياء من هذا القبيل ؟ (اهدى بس متبقاش اوفر قولنا مبنعملش عليك أفلام مفيش حاجة اسمها اصلنا قرد او سحلية اومال ليه سموه بالأسم دا ؟ هنقولك بس الأول شوف صورته عشان تتخيل معانا

مخ السحلية
اللي لونه أحمر

ليه إسمه مخ السحلية؟

سموه بالأسم دا لأنه “حيوان” شوية في نفسه او بمعنى اصح .. مسئول عن الحاجات المشتركة بينّا و بين اي كائن حي تاني زي الأكل و الشرب و الجنس و النوم و الخوف و اي حاجة تانية ممكن تحافظ علينا “في أمان” .. ايوة هو دا كل دوره .. اننا نفضل في اماااااان

و دي شوية أمثلة على الدور اللي بيقوم بيه | دوس هنا

لو شوفت كلب في الشارع و قررت تجري فدا بسبب مخ السحلية اللي فيك اللي بيصورلك انك هتموت لو وقفت عشان الكلب هياكلك
لو شوفت اكل و قررت تاكل “وانت مش جعان اصلاً” فدا بسبب مخ السحلية اللي فيك اللي بيصورلك انك ممكن تدوخ و تتعب لو مأكلتش مع انك لسة داببها
لو قاعد بتذاكر و انت لسة صاحي من النوم و فايق و حسيت انك عايز تنام فدا بسبب مخ السحلية اللي فيك اللي بيصورلك انك تعبان و محتاج تريح

في الـ3 حالات (مخ السحلية) لعب على مشاعر اساسية عندك كلها فيها عامل مشترك انك تبقى في السلييييييييييييم او “في الأمان” …. طيب ايه علاقة دا بـإم بي سي 2 و افلامها ؟

خد بالك من دي

قالك ان واحد من النتايج اللي بيتسبب فيها مخ السحلية هو التسويف

علاقة مخ السحلية بالتسويف؟

طب احنا قولنا مخ السحلية مهمته يخلي الانسان في الأمان دايماً .. طيب ايه علاقة التسويف بالأمان ؟ خلينا نجاوب على السؤال دا بأمثلة
كام مرة كان عندك مادة امتحانها بعد اسبوع و مخك قالك يا عم احنا لسة في الامان اقعد النهاردة العبلك ماتشين بلاي ستيشن و استمتع متبقاش كئيب؟
طب كام مرة كنت قاعد بتشتغل او بتذاكر و فجأة كبس عليك النوم و اجلت اللي بتعمله لتاني يوم؟
كام مرة كنت متعرض لموقف متاح ليك فيه انك تختار ميعاد من ميعادين و انت كل مرة كنت بتختار الميعاد الابعد؟

التسويف
انت اهو

ملحوظة** مخ السحلية دا حويط 🙈 في كل مرة هيخليك تسبب سبب لنفسك على اعتبار ان الامان هيكون موجود في السبب دا**

يعني لو سوفت مذاكرتك و شغلك لتاني يوم هيكون بيقنعك انك دلوقتي حالاً تعبان و لازم تنام
لو قدامك تختار ميعاد من اتنين هيقنعك تختار الميعاد الابعد عشان يبقى قدامك فرصة كبيرة تذاكر او تخلص شغلك قبل الميعاد دا
لو قدامك مادة و قبلها اسبوع هيقنعك ان لسة وقت كبير اوي العبلك ماتشين او شوفلك فيلمين و سلي نفسك دي كدا كدا مادة بسيطة و هتلمها
اما لو انتي امتحانك بكرة الصبح فهو هيقنعك انك لازم تكلمي صاحبتك ترغي معاها في التليفون شوية عن صحباتكو التالتة و كدا كدا دا امتحان شفوي بدرجتين يادوبك تقرأي المنهج

إم بي سي 2 أذكى منك

طيب هي إم بي سي 2 بقى عارفة كل الكلام العلمي دا عشان تجيب الافلام في الوقت دا بالذات ؟ في الواقع الله اعلم .. بس من جانبنا يعني نعتقد ان فريق تسويق محترف جداً شغال في القناة مش صعب عليه انه يكون عارف معلومة زي دي خصوصا و ان اي حد بيدرس علم التسويق بيكون مهتم بعلم النفس

الخلاصة

طب نلخص الكلام ؟ نلخص
الموضوع عبارة عن عملية سيكولوجية او نفسية بحتة … احنا طموحين و عمالين نعافر في الدنيا عشان ننجح و مخ السحلية كل دوره انك تفضل عايش “عادي” … و طبعا عشان تفضل عايش انت مش محتاج تعافر .. طيب ما تأنتخ بقى ليه الفرهدة؟ .. ما احنا كدا كدا في الامان و حلوين ^_^ .. و طبعا في كل مرة بيضحك عليك و كل مرة بتروح متحلش حاجة في امتحانك لانك مذاكرتش و ضيعت الوقت .. لأنك مبتعملش دا مرة واحدة ! انت بتعمله كل يوم !!! :/ اه مخ السحلية حويط و بيقنعك في كل مرة !

طب اصدمك؟ احياناً الفيلم مبيكونش جديد صح؟ 😃 في الوقت دا مخك بيلجئ لحيلة تانية يوهمك بيها ان اينعم الفيلم مش جديد بس هو يستحق يتشاف تاني و ياعم انت كدا كدا لسة في الأمان دا الامتحان بعد 10 ايام

**ملحوظة كمان مهمة… مخ السحلية وظيفته يحطك في الأمان المصحوب بالراحة مش الأمان المصحوب بالتعب.. يعني متفكرش في انه المفروض يخليك مثلا تذاكر كويس عشان تجيب تقدير و تبقي كدا في الأمان… لا هو الامان بتاعه انك تذاكر قليل و متتعبش و المقبول حلو

إيه الحل اللي نقدر بيه نتغلب على مخ السحلية

للأسف مخ السحلية مبيجيش بالتدريج .. هو من اسمه كدا .. عمرك شوفت سحلية عشان تموتها بتضربها براحة ؟ ! لازم تديها بالشبشب او تفجرها… و كذلك الجزء دا من مخنا و المدعو مخ السحلية ! 😂 هتضربه بالشبشب ؟ لأ دا تهور 😭بس هتقاومه مقاومة قوية

اقطع السلك لو بتسوف عشان تتفرج ع التليفزيون
.. امسح اللعبة من عندك لو بتسوف عشان تلعبلك ماتشين
اعمليلها بلوك لو بتسوفي عشان بتعملي شات معاها
لو بتسوف عشان بتتفرج على افلام إم بي سي 2 وقت الأمتحانات .. امسح القناة

طب نصدمك تاني؟ القناة مش بتجيب افلام حلوة وقت الإمتحانات بس.. بتجيب أفلام حلوة طول السنة بس مخك بيقنعك تتفرج اكتر وقت المذاكرة عشان فرجتك هيترتب عليها تضييع شئ لو عملته هتتعب (امان مصحوب براحة متنساش)

الفيديو دا للكتاب الكبير بيتكلم فيه عن مخ السحلية و بيقول بشكل واضح إنك لو عايز تنجح في أبسط الاشياء في الحياة اتغلب على مخ السحلية و التسويف

قولنا كدا بقى انت مأجل ايه المفروض تعمله عشان تقرأ المقال دا ؟

Share this Post

2 Comments

  1. التنسيق عاجبني وظاهر كويس في الموبيل … والفيديوهات catchy جدا

    بس فيديو العالم ما ظهرش .. متشوقة اشوفة

    1. سعداء جداً برأيك يا هاجر ممكن تبعتيلنا في صفحتنا على فسبوك شكل الفيديو ظاهر عندك ازاي لانه شغال عندنا عادي؟

Leave a Comment

Your email address will not be published. Required fields are marked *

*
*